ព្រះសីហនុ៖ អគ្គិភ័យបានឆាបឆេះក្លឹបកម្សាន្តមួយកន្លែងមានឈ្មោះ Julie & Anna Tokyo បណ្តាលឲ្យមនុស្សប្រុសស្រីចំនួន ២នាក់ស្លាប់ពេលបញ្ជូនទៅសង្គ្រោះនៅមន្ទីរពេទ្យ និង២នាក់ទៀតរងរបួស។

ហេតុការណ៍នេះបានកើតឡើងនៅវេលាម៉ោង ៨យប់ ថ្ងៃទី៣០ ខែមករា ឆ្នាំ២០២៣ នៅម្តុំឧតុនិយម ស្ថិតក្នុងភូមិ៣ សង្កាត់៣ ក្រុង និងខេត្តព្រះសីហនុ។

សមត្ថកិច្ចបានប្រាប់ជាបឋមថា ករណីអគ្គីភ័យឆេះក្លឹបខាងលើនេះ គឺបណ្ដាលមកពីការធ្វេសប្រហែសក្នុងការផ្សារដែកនៅផ្នែកដំបូលហើយផ្កាភ្លើង បានខ្ទាតមកត្រូវសាឡុងក្នុងក្លឹបទើបបណ្ដាលឱ្យឆាបឆេះបង្កើតជាផ្សែងហប់ខ្យល់ ជាហេតុធ្វើឲ្យបុគ្គលិកនៅក្នុងក្លឹបមានការស្លន់ស្លោថប់ដង្ហើមដួលសន្លប់នៅក្នុងក្លឹប។

សមត្ថកិច្ចបានប្រើប្រាស់ទឹកអស់២គ្រឿងទើបគ្រប់គ្រងអគ្គិភ័យនោះបានទាំងស្រុងនៅវេលាម៉ោង៩កន្លះយប់។ ជនរងគ្រោះទាំង២នាក់ដែលបានស្លាប់នោះ ដោយម្នាក់ជាជាងផ្សារដែកវាំងនន និងម្នាក់ទៀតជាអ្នករត់តុ។

ក្រោយកើតហេតុ សមត្ថកិច្ចបាននាំខ្លួនថៅកែក្លឹប និងអ្នកគ្រប់គ្រងក្លឹបទៅសួរនាំនៅអធិការក្រុងព្រះសីហនុជុំវិញករណីអគ្គីភ័យនេះ៕